Kryeministri i Shqipërisë, Edi Rama shprehu sot besimin se Partia Socialiste do të fitojë mandatin e 4 qeverisës në zgjedhjet parlamentare të 11 majit 2025.

Në fjalën e tij në Kuvendin Rinor Kombëtar të PS, Rama bëri thirrje se Partia Socialiste është e vetmja që mund të përmbushë vizionin Shqipëria 2030, me anëtarësimin e vendit tonë në Bashkimin Europian.

“100 ditë nga sot, kjo parti, forca e përbashkët e shqiptarëve, Partia Socialiste e Shqipërisë do ta marrë mandatin e 4 për ta ngritur atdheun në majën e lartë të 2030. Aty ku Shqipëria do të jetë më në fund si gjithë Europa. Në atë majë ne do ta vendosim përgjithnj flamurin tonë kombëtar, aty ku është oborri i shtëpisë së familjes europiane, ku do hyjmë nga dera kryesore si të barabartë mes të barabartëve, anëtarë të BE”, u shpreh Rama.

Atë majë nuk e afroi koha, theksoi Rama, por e afroi vizioni, e afroi skuadra, e afroi përpjekja e gjithë këtyre viteve, në të gjitha drejtimet, por duke filluar nga drejtimi i kurrizit përballë të huajve dhe vënia në vend e dinjtitetit të Shqipërisë në sytë e botës.

“Të gjithë duhet ta dinë mirë, njësoj siç e di shumica e shqiptarëve, se kjo nuk është koha për të lozur me fatin e Shqipërisë, duke e djegur votën në oxhakun gjithë blozë të një partie të vjetër, që të vetmen gjë demokratike ka llagapin e saj, apo në mangallët e ca partiçkave të reja, që të vetmen gjë të re kanë moshën e pronarëve të tyre”, u shpreh kryeministri.